The Scope

Neyðin kennir naktri konu ... að markaðssetja sig á netinu

Í kjölfar efnahagshrunsins hafa mörg fyrirtæki og markaðsdeildir þurft að hugsa alla markaðssetningu upp á nýtt. Skyndilega er ekkert fjármagn í flottar sjónvarpsauglýsingar, áberandi heilsíður og opnur, eða stórar herferðir. Í staðinn þarf að beita öðrum aðferðum sem krefjast lítils fjármagns, en oft meiri þekkingar og kænsku. Þá er markaðssetning á netinu það sem verður ofan á.

Hægt er að ná gríðarlegum árangri fyrir lítið sem ekkert fé, ef fólk kann réttu aðferðirnar. Sjálfur hef ég fengist við markaðssetningu af þessu tagi síðan 1997 og hef haft unun af því að geta fyrir lítið sem ekkert fé skákað stórum fyrirtækjum með milljónabudget. IfTheWorldCouldVote.com er eitt dæmi um slíkt þar sem okkur tókst að fá yfir 800.000 manns frá 213 löndum til að kjósa, án þess að eyða krónu í auglýsingar á meðan The Economist náði aðeins broti af þeim fjölda í sína könnun.

Undanfarin ár hef ég haldið fjöldann allan af fyrirlestrum og námskeiðum um markaðssetningu á Internetinu og nú eftir áramót hefur orðið mikil aukning í aðsókn á námskeiðin. Það er mjög ánægjulegt að sjá fólk og fyrirtæki uppgötva máttinn sem þessi miðill hefur og hvað hægt er að gera. Á námskeiðinu kenni ég þátttakendum að nýta Facebook, Twitter, blog, orðrómsmarkaðssetningu, leitarvélar og fleira auk hefðbundinnar markaðssetningar á netinu. Næsta námskeið verður haldið næstkomandi fimmtudag og föstudag kl. 9-16.

Hér eru nánari upplýsingar um dagskrá, verð og skráningu á námskeiðið Náðu árangri á netinu.

Hjörtur

Nýtt námskeið: Vertu ofan á í kreppunni

Það er mikilvægt að átta sig á því að í öllum breytingum felast tækifæri. Að sjálfsögðu eru margir sem ekki ná að bjarga sér þegar áfall líkt og það sem við höfum orðið fyrir dynur yfir þjóðina. Því er mikilvægt að búa sig vel undir það sem er framundan. Þeir sem munu komast af eru þeir sem aðlagast breyttum aðstæðum og tileinka sér nýjar áhrifaríkar aðferðir í sinni markaðssetningu.

Því hef ég sett upp nýtt námskeið - Vertu ofan á í kreppunni. Námskeiðið byggir að mestu á námskeiðinu "Náðu árangri á netinu" þar sem ég kenni helstu aðferðir við markaðssetningu á netinu í dag, en sérstök áhersla verður lögð á markaðssetningu á krepputímum.

Fáðu þekkinguna inn í hús
Dagana 3.-4. Nóvember næstkomandi mun ég standa fyrir tveggja daga námskeiði í markaðssetningu á krepputímum með megin áherslu á internetið, en Internetið er eini miðillinn þar sem útlit er fyrir áframhaldandi vöxt á næstu mánuðum.

Markmiðið með námskeiðinu er að þátttakendur öðlist skilning á helstu þáttum markaðssetningar á netinu, áherslubreytingar á krepputímum og læri aðferðir sem nýtast strax til aukins árangurs. Meðal þess sem farið er eru markaðsaðgerðir sem virka á krepputímum, söluhvatar á vefsíðum, leitarvélabestun, Google AdWords, blogg markaðssetning, “viral markeitng”, “social media marketing” og margt fleira.

Nú er mikilvægt að tryggja að góð þekking og skilningur á helstu þáttum markaðssetningar á Internetinu sé til staðar inn í fyrirtækinu.

Nánari upplýsingar um "Vertu ofan á í kreppunni"

Hjörtur

Næsta námskeið í markaðssetningu á Internetinu

Þá er komið að næsta námskeiði í markaðssetningu á Internetinu. Fimmtudag og föstudag í þessari viku verð ég með tveggja daga námskeið í markaðssetningu á Internetinu á Grand Hotel Reykjavik.

Síðast var uppselt, þannig að tryggðu þér sæti í tíma!

Markmiðið með námskeiðinu er að þátttakendur öðlist skilning á öllum helstu þáttum markaðssetningar á netinu og læri aðferðir sem nýtast til árangurs. Vægi Internetsins í markaðssetningu eykst til muna í samdrætti og því mikilvægt fyrir fyrirtæki að tryggja að góð þekking og skilningur á efninu sé fyrir hendi innanhúss.

Námskeiðið hefst klukkan 9.00 báða dagana og stendur til klukkan 16.00 Boðið er upp á kaffiveitingar í hléum en hádegismatur er ekki innifalinn.

Nánari upplýsingar um námskeiðið

Skráðu þig hér!

Hjörtur

Er hægt að treysta viðskiptum á netinu?

Traust á netinu er viðfangsefni sem ég hef fjallað um nokkrum sinnum áður (sjá "Kynntu þig, líka á netinu" og "Myndirðu treysta bloggara") og á eflaust eftir að fjalla um nokkrum sinnum í viðbót. Um síðustu helgi var slegið upp á forsíðu eins af blöðunum fyrirsögn um mann sem hafði verið illa svikinn af viðskiptum á netinu. Það vekur upp spurninguna hvort að viðskipti á netinu séu örugg. Ég vil meina að viðskipti á netinu séu öruggari en viðskipti annars staðar og ég ætla að útskýra af hverju.

Í fyrsta lagi, þá eru viðskipti á netinu bara eins og viðskipti annars staðar, samskipti milli tveggja einstaklinga sem innihalda skipti á peningum eða ígildi þeirra. Spurningin er svo bara hvort að aðilinn sem þú átt viðskipti við sé heiðarlegur eða ekki og hvernig þú getir komist að því án þess að brenna þig.

Þegar viðskipti eiga sér stað almennt þá treystum við fólki sem við eigum viðskipti við af því að við þekkjum viðkomandi eða vörumerkið, af því að vitum hvar viðkomandi er til að við getum leitað réttar okkar ef eitthvað kemur upp á eða af því að einhver hefur mælt með viðkomandi aðila.

Þetta eru sömu atriði og þú þarft að hafa í huga þegar þú stundar viðskipti á netinu. Veistu hver viðkomandi er? Þú átt að sjá vörumerki viðkomandi verslunar og upplýsingar um staðsetningu. Helst eiga að vera nöfn ábyrgðarmanna og alltaf þurfa að vera upplýsingar um hvernig þú getur haft samband við viðkomandi. Ef þær upplýsingar eru ekki fyrir hendi, þá á maður ekki viðskipti við viðkomandi aðila.

Vottun á öryggi er annað sem þarf að skoða. Ef þú gefur upp greiðslukortaupplýsingar þá á slóðin að byrja á https en ekki bara http. Þetta segir þér að viðskiptin fari fram á öruggum vefþjóni. Þú ættir jafnframt að sjá vottunarmerki frá t.d. Verisign.

Ummæli eru mjög góð til þess að kanna hver reynsla annarra viðskiptavina er af viðkomandi vefverslun. Ef við tökum vef eins og E-Bay sem dæmi þá eru milljónir manna sem eiga viðskipti í gegnum þann vef við fólk sem þeir hafa aldrei hitt, séð eða heyrt um áður. Til þess að tryggja öryggi í þessum viðskiptum þá er fólk hvatt til þess að skrifa ummæli um hvernig viðskiptin hafi verið. Ef seljandinn sem þú ætlar að kaupa af er ekki með yfir 99% jákvæð ummæli, þá er ástæða til þess að skoða neikvæðu ummælin. Ef “eðlilegar” ástæður eru fyrir þeim geturðu tekið ákvörðun um að eiga samt viðskipti við viðkomandi söluaðila eða ákveðið að sleppa því ef þér líst ekki á ummælin.

Ummæli sem þessi er hægt að finna um nánast hvað sem er á netinu. E-Bay er með ummæli um alla seljendur og kaupendur þar, Cnet er með ummæli um hugbúnað og ýmis konar tæki, TripAdvisor er með ummæli um hótel, gistiheimili og ferðaþjónustuaðila og svo mætti lengi telja.

Á netinu geturðu flett upp jafnvel þúsundum ummæla fyrri viðskiptavina þeirrar verslunar sem þú ætlar að skipta við. Það er öryggi sem þú nýtur sjaldnast í viðskiptum utan netsins. Það er því um að gera að fletta upp nafni fyrirtækisins og ummælum eða “reviews” áður en viðskiptin fara fram.

Hjörtur Smárason
(þessi grein birtist í Viðskiptablaðinu fimmtudaginn 22. maí 2008)

Myndirðu treysta bloggara?

Orðstír er verðmætasta eign hvers manns og hvers fyrirtækis. Því eru mörg fyrirtæki sem leggja mikið upp úr því að geta sér gott orð og að vel sé talað um þau. En hversu miklu máli skiptir það hver það sé sem tali vel um fyrirtæki? Hversu mikið traust hefur bloggari hjá neytendum eða almenningi?

Edelman birti nýlega niðurstöður úr "trausts-mælinum" sínum þar sem kom í ljós að þeir sem njóta mest trausts eru "fólk eins og maður sjálfur". Framkvæmdastjórar fyrirtækja hafa hingað til vermt neðsta sætið á þessum lista, en nú hefur það breyst. Svona voru niðurstöðurnar:

Fólk eins og maður sjálfur - 60%
Greiningaraðilar - 56%
Háskólafólk - 54%
Læknar/heilbrigðisfólk - 53%
Góðgerðarsamtök og félagasamtök - 50%
Almennir starfsmenn fyrirtækja - 43%
Framkvæmdastjórar fyrirtækja - 23%
Bloggarar - 12%

Bloggarar koma ekki sérlega vel út úr þessari könnun sem er kannski þvert á það sem verið er að predika núna um að fyrirtæki eigi að nýta bloggið meira. En ég hef líka ákveðna gagnrýni á uppsetninguna á könnuninni. Eða öllu heldur skilgreiningunni á bloggara (sem er í raun óskilgreindur). Hver er bloggari? Getur bloggari ekki tilheyrt hverjum sem er af hinum hópunum? Er þetta ekki bara eins og að spyrja hversu mikið traust ég beri til manneskju, án þess að skilgreina frekar hvort það sé ókunnugur maður sem ég mæti úti á götu eða einhver sem ég hef byggt upp einhvers konar samband við?

Ég treysti ekki því sem bara einhver bloggari segir sem ég veit ekkert hver er. En ef um er að ræða bloggara sem ég les reglulega, skrifa athugasemdir hjá, og sem að jafnvel lesið bloggið mitt og skrifar inn á það, þá er um allt annan hlut að ræða. Þá er þetta orðinn einhver sem ég þekki og hef samskipti við.

Markmið fyrirtækja með því að blogga er að byggja upp samband við lesendurna. Þetta eru stöðug samskipti þar sem þú afhjúpar persónulegu hliðar fyrirtækisins, því að fyrirtæki er jú ekki annað en einstaklingarnir sem mynda það. Þetta er vettvangurinn þar sem þú færð lesendur til að eiga samskipti við þig, miðlar til þeirra upplýsingum og byggir upp traust. Þeir sem blogga geta verið framkvæmdastjórar fyrirtækja (sem væntanlega hækkar traustið upp í 23%), almennir starfsmenn (43%) eða ef vel tekst til og ég fæ lesendurna til að samsama sér með mér, fólk eins og maður sjálfur (60%). Þannig getur bloggari fært sig úr botnsætinu á traustslistanum upp í efsta sætið.

Það sem þessi rannsókn segir okkur er því ekki að það borgi sig ekki að blogga, heldur að ef við ætlum að blogga, þá borgi sig að vera bara maður sjálfur, þannig að fólk geti samsamað sig með því sem með því sem maður er að gera og upplifa. Með heiðarleika og einlægni byggir maður upp traust. Bæði innan bloggheima og utan.

Hjörtur Smárason

Af hverju mest er ekki alltaf best

Eitt það mikilvægasta við markaðssetningu á leitarvélum er val á leitarorðum. Þú vilt að vefurinn þinn finnist þegar ákveðin orð eru slegin inn. Og hann á ekki bara að finnast, hann á mjög gjarnan að vera ofar í niðurstöðunum en samkeppnin og best er að vera fyrir ofan brot á fyrstu síðu af leitarvélaniðurstöðunum. Annars er hætta á að notandinn finni ekki vefinn þinn þó að leitarvélin geti gert það.
Val á leitarorðum er ekki alltaf jafn einfalt og það kann að hljóma í fyrstu. Nokkur leitarorð eru augljós, eins og nafnið á fyrirtækinu þínu, vörunni þinni og þjónustu, bæði sérnafn og almennt heiti. Það segir sig nokkurn veginn sjálft að þessi orð þurfa ákveðið vægi á vefnum og vefurinn þinn á mjög gjarnan að vera í efsta sæti þegar nafnið á fyrirtækinu er slegið inn.

Umferð á leitarorð
Eitt af því sem þú þarft að skoða þegar þú hefur listað upp líkleg leitarorð, er hversu oft hefur verið leitað að þeim. Það eru til tól á netinu sem þú getur notað til þess að mæla það og bera saman mismunandi leitarorð. Þetta gera margir og veðja svo á það leitarorð sem hefur mesta umferð. En það þarf ekki að vera besti kosturinn.

Samkeppni um leitarorð
Þú þarft líka að skoða hversu mikil samkeppni er um leitarorðin. Fjöldi niðurstaðna gefur ákveðna vísbendingu en mæling á styrkleika þeirra síðna sem koma í fyrstu tíu niðurstöðunum skiptir meira máli. Þú getur mælt þann styrkleika og séð hvort það sé yfir höfuð fræðilegur möguleiki að koma vefnum þínum upp fyrir þessa vefi. Ef þú ert með hefðbundinn fyrirtækjavef en toppniðurstöðurnar eru vefir með hundruðum þúsunda og jafnvel milljónum inntengla þá er ljóst að það verður gríðarlega mikil vinna og kostnaðarsöm að koma vefnum þínum inn á topp 10 listann. Næstvinsælasta leitarorðið í umferðarmælingu gæti verið í mun minni samkeppni og því mun líklegra til þess að skila þér árangri.

Árangur
Markmiðið er væntanlega ekki að ná sem mestri umferð inn á vefinn, heldur að ná sem mestum viðskiptum. Þú þarft því að skoða vel frá hvaða leitarorðum viðskiptavinir þínir koma mest. Ef þú ert að selja hugbúnað þá geturðu hugsanlega fengið fullt af umferð út á leitarorð eins og Britney Spears, ef þér tækist að skora hátt á leitarvélunum fyrir það. En ekki búast við því að margar af heimsóknunum endi í viðskiptum.
Eitt af því sem er að breytast með tilkomu netsins og netverslana er að vöruúrvalið og framboðið er orðið miklu meira. Þetta er ekki eins og var að verslanir þyrftu að velja sjálfar tíu eða tuttugu vörur sem líklegastar voru til þess að seljast og gera aðeins þær sýnilegar. Fólk leitar að nákvæmlega því sem það vantar. Þess vegna getur verið góð regla að vera með mikið framboð af síðum og leitarorðum eða leitarorðafrösum. Langir frasar skila mun minni umferð, en þar er mun minni samkeppni, mun auðveldara að komast í topp tíu niðurstöðurnar og að öllum líkindum ertu að fá umferð sem er að leita að akkúrat því sem þú býður upp á, og þar af leiðandi mun líklegri til þess að skila þér þeim viðskiptum sem þú ert að leita að.

Hjörtur Smárason
(þessi grein birtist í Viðskiptablaðinu fimmtudaginn 6. mars 2008)

ps. Ef þú vilt lesa meira um hvernig leitarvélar gjörbreyta sölu, þá mæli ég með The Long Tail: Why the Future of Business is Selling Less of More eftir Chris Anderson en sú bók var ein áhrifamesta viðskiptabók ársins 2006.

Ný dagsetning á námskeiði

Námskeiðið sem vera átti dagana 6.-7. mars næstkomandi hefur verið flutt til 17.-18. apríl. Staðsetningin er sú sama, á Grand Hotel og dagskráin er að öðru leyti óbreytt.

Nánari upplýsingar um námskeiðið "Náðu árangri á netinu - námskeið í markaðssetningu á Internetinu".

Hjörtur

Næsta námskeið

Þar sem ekki komust allir sem vildu á námskeiðið sem ég var með í janúar í markaðssetningu á Internetinu, verður annað námskeið haldið næstkomandi fimmtudag og föstudag, 6.-7. mars.

Á námskeiðinu er farið yfir alla helstu þætti markaðssetningar á Internetinu og er markmiðið að þátttakendur læri aðferðir og ráð sem þeir geti strax nýtt til að bæta árangur sinn á netinu.

Nánari upplýsingar um "Náðu árangri á netinu - námskeið í markaðssetningu á Internetinu".

Hjörtur

Hvernig virka leitarvélar?

Hefurðu stundum velt því fyrir þér hvernig leitarvélin ákveði hvernig hún raði niður síðunum sem birtast í niðurstöðunum? Af hverju eru sumar síður númer eitt og aðrar birtast ekki fyrr en á síðu 13? Hvernig síður raðast niður og hvaða þættir hafa áhrif þar á er eitt af stærstu atvinnuleyndarmálunum í dag. Það eru bara örfáir einstaklingar hjá hverju leitarfyrirtæki sem raunverulega vita hvað skiptir máli og hvað ekki. Og þeir eru stöðugt að breyta reikniaðferðinni til þess að bæta niðurstöðurnar.

En spámennirnir eru margir sem telja sig hafa fundið út hvernig leitarvélarnar virka. Sumt er hægt að lesa svart á hvítu í leiðbeiningum leitarvélanna. En annar fróðleikur um hvernig leitarvélarnar raða niðurstöðunum er byggður á reynslu manna sem hafa unnið lengi við leitarvélabestun og tilraunum þeirra. Af þessari sömu ástæðu ber að fara varlega þegar ráðgjafi um leitarvélabestun er valinn eða þegar „góðum ráðum“ á netinu er trúað. Ef þú gengur of langt eða fylgir röngum ráðum gæti síðunni þinni verið refsað.
Það sem þykir hafa veruleg áhrif á niðurstöður leitarvéla er:

1. Leitarorð
Hvaða orð eru staðsett á síðunni, hvar þau eru og hversu oft kom þau fyrir. Til þess að skora hátt er æskilegt að leitarorðin séu í titli síðu, fyrirsögn, slóð, heitum mynda og í texta. Einnig þurfa leitarorð að koma fyrir í því sem kallast „meta tags“ sem er sérstakur texti í haus síðunnar sem notandinn sér ekki. Til eru nokkur mismunandi „meta tags“ sem eru mismikilvæg. Þú þarft því að velja vel hvaða leitarorð er mikilvægast fyrir hverja síðu því það þýðir ekki að demba bara inn fullt af leitarorðum.

2. Lén
Hversu gamalt er lénið, hver er endingin á því, hvað er það skráð til langs tíma og hvaða sögu hefur það. Og að sjálfsögðu hvert lénið er. .org, .gov og .edu hafa tilhneigingu til þess að skora hærra en .com. Annars er almenna reglan að ef þú ert að hugsa síðuna fyrir íslenskan markhóp, að þá hefurðu hana á .is léni en ef hún er fyrir erlendan markhóp þá hefurðu hana á .com. Leitarvélarnar nota endinguna líka til þess að áætla landfræðilega staðsetningu efnis og þar af leiðandi hversu vel það passar staðsetningu þess sem leitar. Ef .com lén er nýskráð og hefur bara verið skráð til eins árs gæti það bent til þess að lénið sé hugsað til skammtímanotkunar og þar af leiðandi lítils virði.

3. Tenglar
Hversu margir tenglar vísa á viðkomandi síðu, hvaða einkunn hafa þær síður sem að vísa yfir á hana og hvaða orð koma fyrir í textanum sem er virkur sem tengill. Þetta er mjög mikilvægur þáttur og oft vanmetinn í markaðssetningu. Tenglar eru ekki bara mikilvægir til að skila inn umferð heldur líka fyrir leitarvélarnar til þess að ákvarða hversu mikilvæg síðan er. Þau orð sem eru í tenglinum skipta jafnframt verulegu máli.

4. Kóði
Ef þú botnar ekkert í kóðanum á síðunni þinni, þá gerir leitarvélin það ekki heldur. Þú átt að sjá textann á síðunni í kóðanum og hann á að vera ofarlega. Þess vegna eru „flash“ síður mjög slæmar fyrir leitarvélar af því að þær sjá engin leitarorð.
Hversu leitarvélavæn er síðan þín?

Hjörtur Smárason

Markaðssetning á netinu

Markaðssetning á netinu skiptir fyrirtæki orðið sífellt meira máli enda verður sífellt erfiðara að ná í markhópana í gegnum hefðbundna miðla. Búist er við 48% aukningu í auglýsingafé sem varið er í markaðsaðgerðir á Internetinu í Bandaríkjunum á þessu ári. Það er því engin kreppa á því sviði. Þótt ég hafi ekki séð neinar sambærilegar tölur fyrir Ísland má gera ráð fyrir því að þessi tala fari líka hratt hækkandi hér. Þeir sem ætla sér að vinna samkeppnina verða einfaldlega að nýta sér netið í dag.

Fyrir mörg fyrirtæki snýst markaðssetning á Internetinu ennþá um uppsetningu á heimasíðu og síðan þegar eitthvað meira þarf að gerast, þá er hent inn borða á mbl.is eða Vísi. En markaðssetning á Internetinu snýst um svo miklu meira en þetta. Þegar búið er að smíða vefinn hefst fyrst markaðssetningin. Það er algengur misskilningur að halda að vefhönnuðurinn eða forritarinn sjái líka um markaðssetninguna á Internetinu en oftast er það þannig að það eru aðrir sem sérhæfa sig í markaðssetningunni, enda reynir á allt aðra hluti þar.

Staðsetning, staðsetning og staðsetning
Þetta er bara eins og ef þú byggir nýja verslun. Þú færð ekki byggingarverktakann eða arkitektinn þinn til að markaðssetja verslunina. Það sem er oftast talað um að skipti mestu máli þegar þú opnar nýja verslun er staðsetningin. Þú þarft að vera viss um að viðskiptavinirnir þínir geti fundið verslunina, komist að henni, fundið það í henni sem þá vantar og fengið afgreiðslu. Segir sig sjálft.

Það sama gildir um vefinn. Það er til lítils að leggja miklar fjárhæðir í vandaðan og flottan vef ef enginn kemur að sjá hann. Þess vegna þarf líka að leggja pening í að staðsetja vefinn rétt á netinu. Það á þá fyrst og fremst við um leitarvélarnar. Þú vilt að vefurinn þinn komi upp á fyrstu síðu á ákveðnum leitarorðum. Ef leitarorðin eru sértæk og lítil samkeppni um þau er þetta ekki mjög erfitt, en ef þú ert á stórum samkeppnismarkaði getur þurft að leggja á sig mjög mikla vinnu til að ná þessum árangri.

Hanna þarf vefinn með tilliti til þeirra leitarorða sem valin hafa verið. Þau leitarorð þarf að staðsetja rétt á síðunni til þess að leitarvélarnar skilji að þau skipti máli fyrir innihaldið. En leitarvélarnar þurfa líka að fá þau skilaboð að vefurinn skipti einhverju máli fyrir netsamfélagið. Það meta leitarvélarnar út frá þeim tenglum sem vísa yfir á vefinn. Hvaðan koma þessir tenglar, hvaða leitarorð eru í kringum þá og hvað eru þeir margir?

Tenglar skipta miklu máli fyrir leitarvélarnar og þeir skipta líka máli til þess að skila umferð inn á vefinn þinn og gera hann sýnilegan. Við „leitarvélabestun“ fer minnstur tími í að gera síðuna sjálfa leitarvélavæna. Mikill tími fer í rannsóknir og val á réttum leitarorðum en mestur tími fer í að fá góða tengla sem vísa yfir á vefinn með réttum leitarorðum.

Vefurinn er „lifandi“ fyrirbæri sem þarf stöðugt að vera að næra til þess að ná góðum árangri og viðhalda honum.

Hjörtur Smárason
(Þessi grein birtist í Viðskiptablaðinu í dag, fimmtudaginn 7. febrúar 2008)