The Scope

Scope opnar nýjan vef - vidskiptaferdir.is

Í gær opnaði nýr vefur á vegum Scope Communications ehf. sem heitir vidskiptaferdir.is. Þessi vefur er ferðavefur þar sem fólk getur bókað bílaleigubíla, flug og gistingu hvar sem er í heiminum á lægstu vefverðunum. Á vefnum er notast við DoHop flugleitarvélina sem er ein sú hraðvirkasta og yfirgripsmesta á netinu í dag með yfir 660 flugfélög sem þeir fletta upp. Í bílaleigum er boðið upp á Dollar og AutoEurope sem eru með bestu verðin, hvor í sinni heimsálfunni.

Hægt er að leita í tugum þúsunda hótela um allan heim að bestu verðunum og það sem vidskiptaferdir.is býður upp á sem oft er mjög erfitt að finna eru hótelbókanir fyrir hópa. Nú þarftu ekki lengur að borga yfirverð hjá ferðaskrifstofum þegar þú bókar fyrir heilan hóp heldur geturðu leitað bestu tilboðanna á netinu.

Á vefnum er blogg þar sem settar verða reglulega inn fréttir og greinar um áhugaverða veitingastaði, hótel og áfangastaði um allan heim auk þess sem þar munu verða birt sérstök tilboð sem eru í gangi hverju sinni. Hægt er að gerast áskrifandi að blogginu í tölvupósti ef þú vilt tryggja að þú missir ekki af neinu.

Kíktu á vidskiptaferdir.is og athugaðu hvort þú getir ekki sparað þér nokkra þúsundkalla á næsta ferðalagi.

Hjörtur

Blogg Viðskiptablaðsins

Viðskiptablaðið opnaði með pompi og pragt nýjan vef í gærkvöldi. Er hér um að ræða mjög þarfa uppfærslu á vefútgáfu blaðsins og framhald af endurbótum sem gerðar hafa verið á blaðinu sjálfu og óska ég Viðskiptablaðinu til hamingju með þennan áfanga.

Ég hef verið fenginn til þess að blogga inn á Viðskiptablaðinu ásamt nokkrum öðrum, en bloggið er ein af þeim nýjungum sem boðið eru upp á hinum nýja vef. Ég mun samt sem áður halda áfram að blogga hér líka, þannig að þið sem lesið bloggið hér í gegnum RSS eða áskrift í tölvupósti þurfið ekki að hafa áhyggjur.

Ég mæli með því að þið kíkið á hinn nýja vef.

Vefjakrot.is heldur áfram að vaxa hratt

Eftir að hafa farið aðeins niður í umferð í síðustu viku næstum tvöfaldast umferðin í þessari viku á tímaritavefnum vefjakrot.is. Vefurinn er nú kominn í 28. sæti á lista Íslenskrar vefmælingar yfir vinsælustu vefi landsins með yfir 11.000 notendur. Ég get því ekki annað en vel við unað :)

Hjörtur Smárason

Vefjakrot.is - Nýr vefur fær frábærar viðtökur

Ég var að setja nýjan vef í loftið um daginn, www.vefjakrot.is. Vefurinn samanstendur af nokkrum mismunandi bloggtímaritum en þau sem komin eru í loftið eru:
Króm - hið íslenska bílablogg
Grænjaxlinn - um umhverfismál og grænan lífsstíl
Úr smiðju skaparans - um hönnun, listir og arkitektúr
og svo er það hundurinn Vaskur sem bloggar um gæludýr, hunda og gæludýratísku.

Vefurinn er skráður í sjálfvirka mælingu hjá Modernus og fór beint í 33. sætið yfir vinsælustu vefi landsins með yfir 8.000 notendur og skaut þannig afturfyrir sig vefjum eins og minnsirkur.is, tonlist.is og kvikmyndir.is.

Veftímaritin er hægt að fá í ókeypis áskrift í tölvupósti með því að skrá netfangið sitt. Lesendur geta jafnframt skrifað athugasemdir við greinarnar. Vefirnir opna nýja möguleika fyrir auglýsendur til að nálgast afmarkaða markhópa á fljótan og áhrifaríkan hátt á netinu, en eins og allir vita er aðal vaxtarbroddurinn í auglýsingum á netinu.

Hjörtur

Dýrasta lén sögunnar

Nýtt met hefur verið slegið í verði á léni. Margir hafa í gegnum tíðina stundað þá iðju að kaupa lén með það í huga að selja fyrir góðan pening síðar og eru markaðir á netinu sem gera út á þetta. Oftar en ekki selst lénið seint eða ekki, og jafnvel varla fyrir kostnaði. Sum hins vegar borga sig vel upp.

Lénið sem var selt nú var lénið business.com en það fór fyrir 21 milljarð króna. Fram af því höfðu dýrustu lénin verið sex.com og porn.com sem fóru fyrir 940 milljónir annars vegar og 590 milljónir króna hins vegar. Það var fyrirtækið R.H. Donnelley sem keypti business.com en þeir reka meðal annars leitarvél á netinu. Það er augljóst að sumir sjá enn stór ónýtt tækifæri á netinu. Mbl.is greinir frá þessu í dag.

Hjörtur Smárason

Bestu glærukynningar heims

Góðar glærur eru mjög mikilvægar þegar flytja á erindi og kynningar, hvort sem þú ert að kenna, reyna að sannfæra fjárfesta eða bara að grobba þig af góðum árangri. Til er vefur sem heitir Slideshare.net sem gerir fólki kleift að deila glærukynningum sínum með öðrum. Slideshare stóð fyrir valinu á bestu glærukynningu heims og tilkynnti úrslitin í síðustu viku.

Sigurvegararnir að mati dómnefndar voru:
1. ShiftHappens eftir Jbrenman
2. Meet Henry eftir Chereemoore
3. Sustainable Food Lab eftir Chrislandry

Einnig gátu notendur kosið og sigurvegararnir í þeirri kosningu voru:
1. PaniPuri - An Introduction eftir Thakkar
2. ShiftHappens eftir Jbrenman
3. Meet Henry eftir Chereemoore
People’s Choice Winners

Allar eiga þessar glærukynningar það sameiginlegt að notast við stórt letur, stóra grafík og þær segja allar sögu. Þetta eru þrír mikilvægustu þættirnir í góðri glærukynningu. Ég mæli með því að fólk kíki á þetta.

Hjörtur Smárason
(via Guy Kawasaki)

Smekklegar auglýsingar?

Ég hef áður gert auglýsingar sem þykja fara yfir strikið að umfjöllunarefni mínu (sjá hér, hér og hér). Í flestum tilfellum er um að ræða auglýsingar sem sýna myndir af konum sem þykja niðrandi og niðurlægjandi eða klámfengnar og jafnvel gefa afbrigðilegri kynhegðun undir fótinn með undarlegum tengingum við börn og dýr.

Nú hefur verið opnaður nýr vefur, about-face.org sem hefur það að markmiði að vekja athygli á þessum málefnum. Á vefnum birta þeir sýnishorn af því sem er verst og því sem er best. Auglýsingarnar eru flestar frá þekktum vörumerkjum eins og dæmin hér sýna. Þetta eru auglýsingar frá vörumerkjum eins og Bebe, Calvin Klein, Sisley og Francesco Biasa. Á vefnum er einnig að finna vörumerki eins og Diesel, Dior, Gucci, Guess og Versace.

Það að svona auglýsingar skuli vera framleiddar og birtar er eitt. En það er ástæða fyrir því að tískuiðnaðurinn notar svona auglýsingar. Það er ekki einhverjir viðvaningar sem eru að framleiða þessar auglýsingar. Þetta eru stór fyrirtæki sem eyða stórum fjárhæðum í rannsóknir og ráða besta fólkið til að framleiða auglýsingarnar. Vörumerkið sem eru orðin með stærstu tískuvörumerkjum heims, meðal annars með því að nota svona auglýsingar. Með öðrum orðum, þessar auglýsingar eru til af því að þær ná athygli og þær selja. Fyrir þá sem vilja berjast gegn þessum auglýsingum, þá er kannski spurning um að beina sjónum sínum að uppsprettunni. Af hverju selja slíkar auglýsingar? Er það eitthvað í samfélaginu sem veldur? Er það eitthvað sem hægt er að breyta? Er þetta eitthvað sem þarf að breyta?

.

About-face.org ætlar sér alla veganna að leggja sitt af mörkum í baráttunni.

Hjörtur Smárason

Boðið að vera tilraunadýr á nýjum vef Guy Kawasaki

Guy Kawasaki er þekktastur fyrir að vera einn af mönnunum sem kom Apple tölvunum á markað. Í dag starfar hann sem áhættufjárfestir í sprotafyrirtækjum, heldur úti einu af vinsælustu bloggum heims, skrifar bækur eins og The Art of the Start og fylgist með hokkííþróttaiðkun sonar síns. Guy er einn af "bloggfélögum" mínum og bauð mér um daginn að prófa nýjan vef sem hann setur fljótlega í loftið sem kallast Truemors.com (true - rumors).

Guy er mikill áhugamaður um veflýðræði (sem er grundvallarhugsunin í web 2.0) og opið upplýsingaflæði. Nýi vefurinn, Truemors.com byggir á þessum hugmyndum en þar mun fólk geta sagt frá því sem er að gerast og því sem er að fara að gerast. Þetta verður suðupottur upplýsinga, skoðana og upplifana þar sem lýðurinn getur lesið og tjáð umheiminum sína hlið. Truemors sækir innblástur sinn í vefi eins og Twitter, Digg, PostSecret, PopSugar og HotOrNot.

Vefurinn er nú kominn í prófanir en Guy bauð mér að gerast tilraunadýr hjá sér. Ef marka má viðtökur þeirra sem eru að prófa vefinn, sem og reynsluna af fyrirrennurum vefsins og fyrri verk Guy's má búast við að þessi vefur geti náð talsverðum vinsældum þegar hann verður gerður opinber. Ég má enn ekki sýna ykkur neinar myndir af vefnum, en ég geri það um leið og hann verður gerður opinber.

Hjörtur Smárason

Eagle Creek

Scope hefur nýlokið við gerð nýrrar vefsíðu, www.eaglecreek.is. Þar er að finna upplýsingar um hús til leigu í Orlando á Florida. Húsið er glæsilegt einbýlishús staðsett í golf samfélagi, Eagle Creek Golf Community, skammt frá Orlando, Sanford flugvelli, Disney skemmtigörðunum og fjölmörgum golfvöllum. Á síðunni er einnig að finna ýmsa gagnlega tengla og upplýsingar um skemmtigarðana, golfvellina og annað áhugavert í nágrenninu. Smelltu hér til að skoða síðuna.

Leigðu þér eiginkonu!

Ég leigði mér einu sinni lík í Danmörku með ævintýralegum árangri, en þetta hef ég aldrei prófað. Sett hefur verið upp vefsíða, rentawife.be, í Belgíu þar sem þú getur leigt þér eiginkonu. Þetta virkar þannig að þú ferð inn á vefsíðuna og velur þér eiginkonu eftir málum, aldri, hárlit, augnlit og kynþætti og færð hana síðan senda innan 24 tíma. Síðan þegar hún hefur gert sitt gagn getur skilað henni og fengið nýja. Með þessu móti geturðu alltaf verið með nýja eiginkonu í hvert skipti sem vinirnir koma í heimsókn. Þeir eru meira að segja að bjóða núna upp á eiginkonu til prufu í 3 vikur frítt til að kynna fyrirtækið. Ef þú telur þig höndla það, þá geturðu líka leigt þér nokkrar í einu!

Þið getið kíkt á sjónvarpsauglýsinguna hér fyrir neðan:

Ef þú ferð inn á vefinn og skráir þig, þá kemur í ljós að um auglýsingaherferð frá vídeóleigu er að ræða.