The Scope

Toyota rekur starfsmann vegna bloggfærslu

Morgunblaðið segir frá því í dag að starfsmaður hefi verið rekinn frá Toyota vegna bloggfærslu þar sem hann gagnrýnir bílafríðindi yfirmanns hjá fyrirtækinu.

Þetta vekur upp mjög þarfar spurningar um hvenær fyrirtæki sé í rétti til að reka starfsmenn vegna bloggskrifa og hvenær ekki. Nú er þetta þriðja málið á skömmum tíma þar sem bloggfærslur kosta fólk starfið (sem kemst í fjölmiðla) og því ljóst að hér er um vaxandi vandamál að ræða. Eru fyrirtæki að nota þetta sem afsökun til að segja upp starfsfólki? Á fólk ekki rétt á því að tjá sig? Á fólk að passa sig meira þegar það tjáir sig um vinnuveitanda sinn eða mál honum tengdum?

Hvað finnst þér?

Hjörtur

ps. Halldór, ef þú lest þetta, þá býð ég þér (og öðrum atvinnulausum) hérmeð á námskeið sem ég verð með á miðvikudaginn í næstu viku í Salnum í Kópavogi um hvernig maður passar upp á nafn sitt á netinu og byggir upp orðspor sitt. Námskeiðið er frítt fyrir atvinnulausa og er frá kl. 9-12.

Web 2.0 expo í Berlín

Dagana 21.-23. október verður haldin ráðstefna í Berlín um web 2.0 og bloggheima. Þar munu koma saman öll helstu nöfnin í web 2.0 heimum í Evrópu, eins og James Governor frá Redmonk, Jeff Bates frá SourgeForce, Stowe Boyd frá The Messengers og fleirum. Sjálfur er ég einna spenntastur fyrir fyrirlestri James Governor um Electricity 2.0, hvernig rafmagnsframleiðsla framtíðarinnar verður ekki miðstýrð heldur í höndum fólksins.

Dagskráin er einkar áhugaverð um leið og ráðstefnan er frábært tækifæri til þess að hitta og tengjast web 2.0 fólki frá allri Evrópu.

Þar sem ég er þátttakandi í Web 2.0 Expo Europe Blogging Program, þá get ég boðið lesendum mínum 35% afslátt af passanum á ráðstefnuna. Ef þú vilt nýta þér það, notaðu þá þennan kóða: webeu08gr54 þegar þú skráir þig.

Hjörtur

Viltu vinna miða á Vörumerkið ÉG?

Hefurðu þú áhuga á að vinna tvo miða á námskeiðið Vörumerkið ÉG sem haldið verður í salnum á miðvikudaginn kemur?

Nú er tækifærið.

Svona tekurðu þátt:
- Þú skrifar bloggpóst um það af hverju þig langar á námskeiðið Vörumerkið ÉG. Blogpósturinn má líka innihalda sögu um hvernig Google, spjallvefur, blogg eða Facebook hefur komið þér í vanda vegna þess sem hefur verið sett þar inn, hvort sem þú eða einhver annar gerði það.
- Þú setur inn tengil yfir á síðu námskeiðsins:
http://blog.scope.is/namskeid_og_fyrirlestrar/vorumerkid-eg.html
- Þú lætur mig vita með því að senda mér tölvupóst á hjortur (hjá) scope.is. Í tölvupóstinum þarf að koma fram hver þú ert og tengill yfir á bloggfærsluna.

Ég mun svo fara yfir bloggfærslurnar á miðvikudagsmorgun og velja sigurvegarann út frá því hvað mér finnst vera besta færslan. Sigurvegarinn fær síðan miða fyrir tvo á námskeiðið eins og fyrr sagði.

Þú getur lesið meira um námskeiðið á síðu námskeiðsins. Nú eða ef þú hefur ekki áhuga á að taka þátt í keppninni, á geturðu líka farið bara beint inn á salurinn.is og keypt miða þar.

Ef þú hefur einhverjar spurningar varðandi þetta, þá geturðu sent mér póst eða skrifað hana í kommentin hér fyrir neðan.

Hjörtur

1. maí - alþjóðlegur RSS dagur

Já, 1. maí er ekki bara dagur verkalýðsins, heldur líka dagur RSS. Þessu komst ég að þegar ég var að gera könnun á því hvort að fólk héldi upp á 1. maí í hinum ýmsu löndum heimsins. Ýmislegt áhugavert kom í ljós en eitt stóð þó upp úr. Það var sú fullyrðing að 1. maí væri "RSS Awareness Day". Markmiðið með þeim degi er að vekja athygli lesenda á netinu á því hvernig þeir geta nýtt RSS til þess að auðvelda sér lesturinn.

Ef þú lest blogg (sem er næsta víst ef þú ert að lesa þetta), þá er RSS lesari eitthvað sem gæti auðveldað þér verulega lesturinn. RSS lesari er sem sagt forrit sem þú notar til þess að fylgjast með uppfærslum á fréttum eða bloggum eins og sést á meðfylgjandi myndbandi:

Sjálfur nota ég Google Reader til þess að halda utan um uppfærslur frá þeim bloggum sem ég les reglulega. Einnig er hægt að nota Bloglines, My Yahoo eða aðrar þjónustur. Einnig er þetta orðið innbyggt í marga af nýjustu vöfrurunum. Ef þú ert með Gmail er nærtækast að vera með Google Reader. Hins vegar þarftu að vera með Gmail-inn þinn stilltan á ensku til að hafa aðgang að Reader-num. Hvaða þjónustu sem þú velur þér, og hvaða blogg, netsamfélög eða fréttamiðlar það eru sem þú ert að lesa, þá mæli ég eindregið með því að nýtir þér slíka lesara. Spjallborð, YouTube, Flick og fleiri vefir bjóða upp á slíka áskrift.

Og ef þig vantar eitthvað áhugavert að lesa, þá get ég bent á bloggin á vefjakrotinu, Grænjaxlinn sem er blogg um umhverfismál og grænan lífsstíl, Dótakassann sem er blogg um tækni og tölvur, Krómið sem er bílablogg, Úr smiðju skaparans sem er um arkitektúr, hönnun og listir eða Vaskur sem er bloggið hans Vasks (sem er hundur).

Góða skemmtun
Hjörtur

Myndirðu treysta bloggara?

Orðstír er verðmætasta eign hvers manns og hvers fyrirtækis. Því eru mörg fyrirtæki sem leggja mikið upp úr því að geta sér gott orð og að vel sé talað um þau. En hversu miklu máli skiptir það hver það sé sem tali vel um fyrirtæki? Hversu mikið traust hefur bloggari hjá neytendum eða almenningi?

Edelman birti nýlega niðurstöður úr "trausts-mælinum" sínum þar sem kom í ljós að þeir sem njóta mest trausts eru "fólk eins og maður sjálfur". Framkvæmdastjórar fyrirtækja hafa hingað til vermt neðsta sætið á þessum lista, en nú hefur það breyst. Svona voru niðurstöðurnar:

Fólk eins og maður sjálfur - 60%
Greiningaraðilar - 56%
Háskólafólk - 54%
Læknar/heilbrigðisfólk - 53%
Góðgerðarsamtök og félagasamtök - 50%
Almennir starfsmenn fyrirtækja - 43%
Framkvæmdastjórar fyrirtækja - 23%
Bloggarar - 12%

Bloggarar koma ekki sérlega vel út úr þessari könnun sem er kannski þvert á það sem verið er að predika núna um að fyrirtæki eigi að nýta bloggið meira. En ég hef líka ákveðna gagnrýni á uppsetninguna á könnuninni. Eða öllu heldur skilgreiningunni á bloggara (sem er í raun óskilgreindur). Hver er bloggari? Getur bloggari ekki tilheyrt hverjum sem er af hinum hópunum? Er þetta ekki bara eins og að spyrja hversu mikið traust ég beri til manneskju, án þess að skilgreina frekar hvort það sé ókunnugur maður sem ég mæti úti á götu eða einhver sem ég hef byggt upp einhvers konar samband við?

Ég treysti ekki því sem bara einhver bloggari segir sem ég veit ekkert hver er. En ef um er að ræða bloggara sem ég les reglulega, skrifa athugasemdir hjá, og sem að jafnvel lesið bloggið mitt og skrifar inn á það, þá er um allt annan hlut að ræða. Þá er þetta orðinn einhver sem ég þekki og hef samskipti við.

Markmið fyrirtækja með því að blogga er að byggja upp samband við lesendurna. Þetta eru stöðug samskipti þar sem þú afhjúpar persónulegu hliðar fyrirtækisins, því að fyrirtæki er jú ekki annað en einstaklingarnir sem mynda það. Þetta er vettvangurinn þar sem þú færð lesendur til að eiga samskipti við þig, miðlar til þeirra upplýsingum og byggir upp traust. Þeir sem blogga geta verið framkvæmdastjórar fyrirtækja (sem væntanlega hækkar traustið upp í 23%), almennir starfsmenn (43%) eða ef vel tekst til og ég fæ lesendurna til að samsama sér með mér, fólk eins og maður sjálfur (60%). Þannig getur bloggari fært sig úr botnsætinu á traustslistanum upp í efsta sætið.

Það sem þessi rannsókn segir okkur er því ekki að það borgi sig ekki að blogga, heldur að ef við ætlum að blogga, þá borgi sig að vera bara maður sjálfur, þannig að fólk geti samsamað sig með því sem með því sem maður er að gera og upplifa. Með heiðarleika og einlægni byggir maður upp traust. Bæði innan bloggheima og utan.

Hjörtur Smárason

Fólk kjaftar

Eitt af því sem "web 2.0 byltingin" og netsamfélög gera, er að breyta landslaginu fyrir fyrirtæki og markaðssetningu þeirra. Áður fyrr voru það fjölmiðlar sem ekki máttu komast að hinu og þessu hjá fyrirtækjum af því að það gæti haft slæm áhrif á orðstír fyrirtækisins. Þeir voru aðhaldsafl samfélagsins, hið beitta vopn almennings á stjórnmálamenn og fyrirtæki. Fjölmiðlarnir voru það sem fyrirtæki óttuðust en ekki viðskiptavinirnir sjálfir.

Það sem web 2.0 og netsamfélögin hafa í för með sér er að í dag eru allir fjölmiðlar. Þú þarft ekkert að óttast að viðskiptavinirnir fari með eitthvað í fjölmiðla ef hann er ósáttur. Hann er að öllum líkindum nú þegar einn af pennum hinnar nýju kynslóðar fjölmiðlanna sem bloggari eða þátttakandi í netsamfélagi. Þannig að þú getur verið nokkuð viss um að það verður sagt frá ykkar samskiptum á opinberum vettvangi ef þau eru eitthvað til að segja frá. Það er óþægileg tilfinning ef viðskiptavinurinn var ósáttur og ekki tókst að sætta hann, en ef hann er himinlifandi, þá er það mjög góð tilfinning.

Þetta setur aukna pressu á fyrirtæki að standa sig og gera viðskiptavinina ánægða. Munið þið eftir því hvernig allir voru á tánum þegar gagnrýnandinn kemur inn í veitingasalinn og fær sér að borða í myndinni Ratatouille? Nú eru allir þínir viðskiptavinir með slíkt vald eins og gagnrýnandinn og því eins gott að fyrirtækin geti staðið við sitt. Þú þarft að koma fram við alla þína viðskiptavini eins og hann sé gagnrýnandinn og veita honum jafn góða þjónustu, því að hann er gagnrýnandinn. Hann mun skrifa um þig á bloggsíðunni sinni, segja frá þér á spjallborðum, skrifa dóma og veita þér einkunn á netsamfélögum.

Netsamfélögin setja þá kröfu á fyrirtæki að bæði vara og þjónusta sé fyrsta flokks, eða í það minnsta það sem lofað er (og helst aðeins meira). Það er liðin sú tíð að fyrirtæki gætu komist upp með að selja drasl eða veita lélega þjónustu með því bara að auglýsa meira. Það er t.d. talað um það í kvikmyndaheiminum að ekki sé lengur hægt að treysta á vel auglýsta frumsýningarhelgi til þess að bjarga lélegum bíómyndum frá gjaldþroti. Fólk þarf ekkert að bíða fram yfir helgi til þess að fá dómana um myndina, þeir eru komnir um allt á netið strax á frumsýningarkvöldinu og ef myndin var ekki að gera sig, þá koma ekki margir gestir það sem eftir er. Almenna reglan í auglýsingum í dag er að lofa minna og gera meira, í stað þess að búa til skýjaborgir og draumahallir sem valda vonbrigðum þegar á reynir.

Það er því enn mikilvægara en nokkurn tíman áður að fyrirtæki geri sér grein fyrir því hvað sé þeirra áherslu- og samkeppnispunktur. Ætlar þú að keppa í verði, þjónustu, gæðum vöru eða einhverju öðru? Hvað sem þú velur þér, vertu þá bara viss um að þú getir staðið undir því, því að fólk mun kjafta, og það gerir það svo hratt að hvaða fiskisaga sem er má skammast sín.

Hjörtur Smárason
(þessi grein birtist í Viðskiptablaðinu fimmtudaginn 3. apríl 2008)

RSS - hvað?

„Really Simple Syndication“. Hljómar eins og það eigi að vera eitthvað mjög einfalt. Og í sjálfu sér er það ekkert flókið, ef maður veit hvað það er.
RSS er staðall sem notaður er til að miðla efni um netið á einfaldana og þægilegan hátt. RSS er notað til þess að fylgjast með uppfærslum af fréttasíðum og bloggsíðum eða til þess að birta efnið á síðum annars aðila.
Blogg hefur notið mikilla vinsælda upp á síðkastið og margir sem fylgjast alltaf með sömu bloggsíðunum. Þá eru oft vistaðar slóðirnar yfir á bloggið í „bookmarks“ og síðan getur maður smellt á heiti bloggsins þar til að athuga hvort að búið sé að skrifa nýja færslu. En flest blogg bjóða upp á RSS. Þá er oft appelsínugulur ferningur með hvítum punkti niður í vinstra horni og tveimur hvítum bogum yfir. Þetta er tákn fyrir RSS eða textinn RSS í bláum ramma í glugganum í vafraranum þínum sem birtir slóðina. Það þýðir að þú getur klippt slóðina og límt inn í RSS lesarann þinn.
RSS lesari er sérstakt forrit sem fylgist með öllum RSS „feeds“ sem þú ert áskrifandi af. Þá sérðu þegar það koma inn nýjar færslur á uppáhaldsbloggunum þínum og hvað þú hefur þegar lesið. Þetta er mjög þægilegt, sérstaklega þegar maður rekst á nýjar bloggsíður sem áhugavert væri að fylgjast með. Það er ógerlegt að ætla sér að muna allar slóðirnar og mun þægilegra að geta kíkt á einn stað til að sjá uppfærslur heldur en að þurfa alltaf að fara í „bookmarks“ og fletta upp hverri síðu fyrir sig. Sem dæmi um slík forrit eru Feedreader og GoogleReader en einnig er að finna RSS lesara í sumum vöfrurum.
Ef að þú ert með vef sem er uppfærður mjög reglulega með nýjum fréttum eða greinum, þá er um að gera að bjóða upp á RSS. Þannig gerirðu efnið þitt mun aðgengilegra. Annað sem RSS býður upp á er að efnið þitt sé birt á öðrum vefsíðum. Þá getur viðkomandi vefstjóri sett upp ramma eða svæði inn á síðunni sinni þar sem birtast alltaf nýjar færslur af síðunni þinni. Þetta efni getur verið bara fyrirsögnin, ákveðinn fjöldi orða eða öll greinin ásamt myndum. Þannig fær viðkomandi vefstjóra meira efni inn á sinn vef og reglulegar uppfærslur og þú færð sýnileika á þitt efni og umferð frá viðkomandi vef þegar smellt er á fyrirsagnirnar eða „lesa meira“. Þannig getur dreifing á efni með RSS verið öflugt markaðs- og upplýsingatæki.
Fyrir þá sem vilja fylgjast vel með í sínu fagi og vera með á nótunum í því nýjasta sem þar gerist, þá er yfirleitt nýjustu upplýsingarnar að finna á bloggsíðum. Hægt er að finna blogg um nánast hvað sem er, en ólíkt því sem tíðkast á bloggum vefmiðlanna eru mörg blogg sem hafa ákveðna ritstjórnarstefnu og fjalla eingöngu um sinn málaflokk. Það er því um að gera að finna slík blogg og fylgjast með þeim í gegnum RSS lesara.

Hjörtur Smárason
(þessi grein birtist í Viðskiptablaðinu í dag, fimmtudaginn 10. janúar 2008)

Áramótaheit markaðsmannsins - námskeið í markaðssetningu á Internetinu

Jæja, nú er komið árið 2008. Framtíðin er í dag þannig að þú ert vonandi búinn að uppfæra markaðsaðferðirnar þínar. Ef ekki, þá er tækifærið núna.

Um allan heim eru netauglýsingar og önnur markaðssetning á Internetinu í mjög örum vexti á meðan vægi annarra miðlar stendur í stað eða minnkar. Ástæðan er einföld. Með réttri notkun á Internetinu geturðu náð miklum árangri fyrir lítinn kostnað. Það er ekki einu sinni mjög flókið, þú þarft bara að vita hvað þú átt að gera.

Þess vegna býður Scope upp á tveggja daga námskeið í markaðssetningu á Internetinu daga 24.-25. janúar 2008. Á námskeiðinu verður farið í alla helstu þætti er viðkoma markaðssetningu á Internetinu, hvernig á að skapa umferð á vefinn og hvernig á að breyta umferð í viðskiptavini. Einnig verður fjallað um breytt umhverfi á netinu, áhrif netsamfélaga og bloggheima á markaðssetningu, hvernig eigi að skapa jákvætt umtal og hvernig eigi að bregðast við neikvæðu umtali.

Námskeiðið ætti að hent jafnt byrjendum sem lengra komnum. Þú getur lesið meira um námskeiðið hér.

Hjörtur

ps. Ef þú þekkir einhvern sem gæti haft gagn og gaman af þessu námskeiði, sendu viðkomandi þá póst með því að smella hér!.

Skilvirk neytendaþjónusta á netinu

Væri það ekki frábært fyrir okkur neytendur ef við þyrftum ekki að bíða heilu og hálfu dagana í símanum eftir að fá þjónustu? Ég þurfti að hringja í tölvufyrirtæki um daginn af því að tölva konu minnar bilaði aftur, innan við árs gömul. Ég hringdi í fyrirtækið sem seldi tölvuna og var settur á bið. Og síðan beið ég. Og ég beið. Og ég beið. Og fyrirtækið hafði ekki einu sinni fyrir því að segja mér frá því að ég væri númer 348 í röðinni og að meðal-biðtími væri fjórar og hálf klukkustund. Þannig að ég bara beið og beið. Að lokum, eftir rúmar fjörtíu mínútur, sem ég hefði vel getað notað í eitthvað gagnlegra, þá gafst ég upp á að bíða og lagði á. Ég endaði með því að hringja í kunningja minn sem kippti tölvunni í lag.

Væri það ekki ánægjulegt ef að þegar ég þyrfti að kvarta, þá myndi fyrirtækið bara hringja í mig, í staðinn fyrir að ég væri að hringja í þá? Það hljómar vel, en kannski svolítið fjarlægt. Það þarf þó alls ekki að vera jafnfjarlægt og það hljómar. Ef fyrirtæki væru nú dugleg að fylgjast með bloggheimum, þá gæti þetta virkað svona:

Tölvan mín bilar (eða konu minnar, ég nota makka) og það sem ég geri er að skrifa blogg um það þar sem ég tilgreini nafnið á tölvunni og hvenær ég keypti hana og hvað vandamálið er. Þegar ég legg blogggreinina mína út á netið þá er hún pinguð inn á technorati og fleiri svipaðar þjónustur (alla veganna ef þú ert að blogga á réttum stöðum). Það þýðir að bloggfærslan mín er komin inn á bloggleitarvélarnar. Ef neytendaþjónustan er svolítið virk og fylgist með nútímanum, þá skimar hún þessar leitarvélar reglulega, jafnvel nokkrum sinnum á dag, slær inn nafnið á fyrirtækinu sínu og helstu vörumerkjum og fylgist með því sem er skrifað um sig. Þegar svo færslan mín birtist þá geta þeir haft samband við mig beint til að leysa vandamálið mitt. Þeir geta jafnvel gert ennþá betur, ef vandamálinu er nægilega vel lýst hjá mér og leyst vandamálið fyrirfram. Svo geta þeir bara látið mig vita með því að skrifa athugasemd við bloggið mitt, ef ég hef opið fyrir það. Ef ég er ánægður þá er ég mjög vís til að skrifa nýja færslu inn á bloggið mitt um þessa frábæru þjónustu sem ég fékk og öll vandamál verða gleymd.

Með þessum hætti getur fyrirtækið sýnt framúrskarandi þjónustu fyrir opnum tjöldum, leyst vandamálið sársaukalaust fyrir mig sem neytanda og sýnt öðrum neytendum hvers virði það er að skipta við þá. Þeir geta jafnvel náð sér í nokkra nýja viðskiptavini út á þetta vandamál í stað þess að missa nokkra. En því miður er sjaldgæft að fyrirtæki bregðist við bloggfærslum, nema mjög mikill hávaði hafi skapast í kringum viðkomandi bloggfærslu. Bloggið er mikilvægur fjölmiðill sem margir lesa og öll fyrirtæki ættu að gera það líka til að vita hvað er skrifað um þau.

Kannski ég geri tilraun. Kannski ég setji inn kvörtun hér á bloggið mitt næst þegar eitthvað bilar og athugi hvort að ég fái einhver viðbrögð.

Hjörtur Smárason
(þessi grein birtist í Viðskiptablaðinu fimmtudaginn 27. september 2007)

ps. mundu að þú getur fengið greinarnar af blogginu í ókeypis áskrift í tölvupósti. Það eina sem þú þarft að gera er að skrá netfangið þitt í reitinn hérna til hægri og staðfesta feedblitz póstinn sem þú færð í kjölfarið. Þá geturðu verið viss um að missa ekki af því ef ég set inn kvörtun um fyrirtækið þitt ;)

Scrapblog - Skrappbókin á bloggið

Eins og þið náttúrulega vitið, ef þið eruð að lesa þetta, hefur bloggið notið gríðarlegra vinsælda upp á síðkastið og stöðugt koma einhverjar spennandi nýjungar fyrir bloggið. Nú er komið nýtt blogg á markaðinn sem sameinar kosti bloggsins og skrappbókanna (úrklippubókanna) sem einnig hafa notið mikilla vinsælda og Darren Barefoot gerir að umfjöllunarefni á blogginu sínu.

Scrapblog gerir fólki kleift að setja saman myndaalbúm á skapandi og skemmtilegan hátt. Með "drag and drop" er hægt að raða upp myndunum, bæta inn úrklippum og tilbúnum myndum og þú ert kominn með "skrappblogg".

Á scrapblog er hugmyndinni lýst á eftirfarandi hátt:

We created Scrapblog because we wanted to go beyond sharing our photos and videos online. We made Scrapblog drag-and-drop-easy so that everyone can tell their stories and create beautiful multimedia scrapbooks.

Hægt er að bæta inn tónlist, vídeó, textablöðrum við myndirnar og fleiru og í framtíðinni mun verða hægt að panta skrappbókina sína útprentaða eða á geislasdisk.